Emilia
မင်္ဂလာပါ !!!
ကျွန်မမှာ အခုတလောလေးကမှ အကြီးအကျယ် Shock ရခဲ့တဲ့ အဖြစ်အပျက်လေးတခုရှိခဲ့တယ်။ဘာလဲဆိုတော့ Company Group Chat ထဲမှာ ဖြစ်ပွားခဲ့တဲ့ ကိစ္စတခုကြောင့်ပါ ။ ဒီအဖြစ်အပျက်နဲ့ ပတ်သက်ပြီး အကြောင်းအရင်းဇစ်မြစ်ကို ဆက်စပ်စဉ်းစားကြည့်ရင်းက ကျွန်မအခုရေးမယ့် အကြောင်း အရာ ဖြစ်ပေါ်လာခြင်း ဖြစ်ပါတယ် ။
ဒါကတာ့ “Group Chat Etiquette” ဆိုတဲ့အကြောင်းပါ ။
ဒီအကြောင်းအရာကို လူတိုင်းသိပြီး နားလည်ထားပြီးလောက်ကြမယ်ထင်ပါတယ် ။ သိပ်အရေးမကြီးဘူးအထင်နဲ့ သတိ မထားမိတာမျိုးလဲ ဖြစ်ချင်ဖြစ်နေပါလိမ့်မယ် ။ ဒါကြောင့် ကျွန်မ ဒီအကြာင်းအရာနဲ့ပတ်သတ်ပြီး ရှာဖွေဖတ်ရှုထားတဲ့ ဆောင်းပါးများထဲမှ ကောက်နှုတ်ချက်လေးတွေကို ပြန်လည်မျှဝေပေးပါရစေ ။
နည်းပညာတွေတိုးတက်အရေးပါလာတဲ့ ခေတ်ကြီးရောက်လာတဲ့အခါမှာ Organization တွေ Enterprise တွေဟာ လက်ရှိသုံးစွဲနေတဲ့ Traditional communication methods (Fax, Mail ) တွေအစား Collaboration chat applications တွေဖြစ်တဲ့ ( Viber, We Chat, LINE ) စတဲ့ Chat App တွေနဲ့ အဖွဲ့အစည်းအတွင်း ဆက်သွယ်ဆောင်ရွက်မှုများ (Internal Communication ) မြန်ဆန်ထိရောက်နိုင်ဖို့ ပြောင်းလဲသုံးစွဲနေကြပြီပဲဖြစ်ပါတယ် ။ ဒီ Application တွေက အဖွဲ့အစည်း အတွင်း ၊ လုပ်ငန်းခွင်အတွင်း တဦးနှင့်တဦး (သို့) Team တခုနှင့်တခု real-time ဆက်သွယ်နိုင်ပြီး အချင်းချင်း ပူးပေါင်း ဆောင်ရွက်မှုစွမ်းရည်နဲ့ လုပ်ငန်းပြီးမြောက်မှုကို တိုးမြှင့်ပေးလျက်ရှိပါတယ် ။ သုံးစွဲရတာလဲ လွယ်ကူရိုးရှင်းတာကြောင့် အဖွဲ့အစည်းအများအပြား ၊ လူအများအပြား အသုံးများလာကြတာပဲ ဖြစ်ပါတယ် ။
နေ့စဉ် ဒီ App တွေနဲ့ အသုံးပြုပြီးဆက်သွယ်ဆောင်ရွက်မှုများပြုလုပ်ကြတဲ့အခါ မိမိတို့ သတိမထားမိပဲ မေ့လျော့စွာနဲ့ မှားယွင်းသုံးနှုန်းပြောဆိုခဲ့ကြတဲ့ စကားတွေကြောင့် လုပ်ငန်းခွင်တွင်းမှာရှိတဲ့ လုပ်ဖော်ကိုင်ဖက်များနဲ့ ဆက်ဆံရေး ပျက်ယွင်းမှုတွေ တွေ့ကြုံရပါတော့တယ် ။ အဖွဲ့အစည်းအတွင်းရှိ ဝန်ထမ်းတိုင်းဟာ မိမိတို့လုပ်ငန်းခွင်မှာ ပညာရှင် ဆန်စွာပြုမှုဆက်သွယ်ပြောဆိုဖို့နဲ့ ကုမ္ပဏီ၏ လူမှုရေးစံနှုန်းများကို (Social norms of company) တိကျစွာ လိုက်နာဖို့ လိုအပ်ပါတယ် ။ Company ရဲ့ Business Group Chat တွေဟာလဲ မိမိတို့ရဲ့ Professional Area တခုဖြစ်တယ်ဆိုတာကို မေ့ထားလို့မရပါဘူး ။ ဒါကြောင့် မိမိတို့အဖွဲ့အစည်းအတွင်း (သို့မဟုတ်) အခြားပြင်ပအဖွဲ့အစည်းတခုခုနဲ့ Group Chat ပြောဆိုတဲ့အခါ လိုက်နာပြုမူပြောဆိုရမည့် ကျင့်ဝတ်စည်းမျည်းတွေကို အောက်ပါအတိုင်းကောက်နှုတ်ရေးသား ဖော်ပြပေး လိုက်ပါတယ် ။
၁။Chat မှာ ဖော်ပြထားမည့် သင့်အမည်နှင့်ပုံဟာ အလုပ်အတွက် ၊ လုပ်ငန်းခွင်အတွက် သင့်လျော်နေပါစေ
တချို့တွေက Group Chat ရဲ့ Screen Name ကို မိမိရဲ့ Nick Name ဒါမှမဟုတ် အခြားဆန်းဆန်း ပြားပြားအမည်တခုခု ပေးထားတမျိုးရှိပါတယ် ။ Screen Picture ကိုလဲ မိမိကြိုက်တဲ့ မင်းသားမင်းသမီးပုံ ၊ Super Hero ပုံတွေ သုံးစွဲလေ့ရှိပါတယ် ။ တချို့ဆိုလဲ ဆိုးဆိုးရွားရွား Psycho ဆန်ဆန်ပုံတွေတောင် ထားတတ်ကြပါသေးတယ် ။ ဒါတွေဟာ Professional Area မှာ အသုံးမပြုသင့်တာမျိုးတွေပဲဖြစ်ပါတယ် ၊ မိမိတို့ရဲ့ Social Media တွေမှာတော့ မိမိတို့သဘောရှိ စိတ်ကြိုက်သုံးစွဲခွင့်ရှိပါတယ် ။ Business နဲ့ ပတ်သက်တဲ့ Chat တွေမှာတော့ ဒီလိုဖော်ပြမှုတွေဟာ လုပ်ဖော်ကိုင်ဖက်တွေရဲ့ မိမိအပေါ်ထားရှိတဲ့အမြင်ကို မှားယွင်းသုံးသပ်မှုတွေဖြစ်စေပါတယ် ။ ဒါကြောင့် မိမိအမည် အရင်းနှင့် လူအမြင်သင့်တော်စေမဲ့ ပုံမျိုးသာ သုံးစွဲသင့်ပါတယ် ။
၂။ မိမိမှစကားစပြောတဲ့အခါ အမြဲတမ်း နှုတ်ခွန်းဆက်စကားဖြင့် စတင်ပြောဆိုပါ ။
Group Chat ထဲရောက်တဲ့အခါမှာ မိမိတို့အနေနဲ့ စတင်စကားပြောတော့မယ်ဆိုရင် “Hi” ၊ “ Hello” ၊ “မင်္ဂလာပါ” စတဲ့ နှုတ်ခွန်းဆက်စကားတွေသုံးပြီးစသင်တင့်ပါတယ် ။ နှုတ်ခွန်းဆက်စကားမပြောပဲ ချက်ချင်း မိမိရဲ့ ပြဿာနာကို အရင်မေးမြန်း ဖြေရှင်းလိုက်တာမျိုးဟာ မယဉ်ကျေးတဲ့အပြုအမူသဘောမျိုး သက်ရောက်စေနိုင်ပါတယ်။ ထို့နောက် မိမိပြောကြားမည့် အကြောင်းအရာကို ပြန်လည်ဖြေဆိုပေးနိုင်မည့်သူကို Attention တပ်ပြီး ၎င်းကို အခုစကားပြောဖို့ အချိန်ရမရ အဆင်ပြေမပြေ အရင် မေးမြန်းရမှာပဲ ဖြစ်ပါတယ် ။ ဥပမာ -
“ Mr. Yang ရှင့် ၊ SAP Software နဲ့ပတ်သက်ပြီး ကျွန်မတို့သိပ်နားမလည်တဲ့အချက်လေးတွေရှိလို့ မေးမြန်းချင်လို့ပါ ၊ အခုပြန်လည်ဖြေကြားပေးလို့ ရနိုင်မလားရှင်” ။
ထိုသူမှ အခုပြန်လည်ဖြေကြားပေးလို့အဆင်မပြေသေးဘူးလို့ ပြန်ပြောတဲ့အခါ ၎င်းရဲ့ ပြန်လည် ဖြေကြား ပေးနိုင်မယ့် အချိန်ကို မေးမြန်းပြီး ဆက်သွယ်ဆောင်ရွက်မှုတွေ ထပ်လုပ်ရမှာဖြစ်ပါတယ် ။ အကယ်၍ မိမိဟာ ဒီ Group Chat ထဲသို့ အခုမှစရောက်သူဖြစ်ခဲ့မယ်ဆိုရင်လဲ မိမိရဲ့ အမည် ၊ ရာထူးနဲ့ ဘယ်ဌာနမှာ ဘယ်အပိုင်းကို တာဝန်ယူဆောင်ရွက် နေကြောင်း မိမိကိုယ်ကိုစတင်မိတ်ဆက်ခြင်းဖြင့် စတင်ရမှာဖြစ်ပါတယ် ။
၃ ။ ရှင်းလင်းတိကျစွာဖြင့် အတိုချုပ်ပြောဆိုပါ ။
Chap App ကိုအသုံးပြုဆက်သွယ်ခြင်းဟာ လတ်တလောဆောင်ရွက်ဖြေရှင်း အဖြေရှာနိုင်မဲ့ လုပ်ငန်းကိစ္စမျိုး တွေအတွက် အသုံးပြုခြင်းဖြစ်တဲ့အတွက် မိမိပြောဆိုမဲ့ အကြောင်းအရာကို ရှင်းလင်းတိကျစွာ အတိုချုပ်ပြောဆိုရမှာ ဖြစ်ပါတယ် ။ မိမိဦးတည်ပြောဆိုမဲ့ အကြောင်းအရာရဲ့ အဓိကအရေးပါသော အချက်တွေကိုသာ ထိထိမိမိ နဲ့ Short Conversation အဖြစ်သာပြောဆိုသင့်ပါတယ် ။ Group Chat ထဲမှာ အခြားလူအများအပြားပါဝင်တဲ့ အတွက် ၎င်းတို့ အားလုံးနှင့် သက်ဆိုင်သောအကြောင်းအရာမျိုးလဲဖြစ်ရပါမယ် ။ အကယ်၍ မိမိဦးတည်ပြောဆိုမည့် အကြောင်းအရာဟာ အချိန်ယူ၍ စေ့စေ့စပ်စပ် ပြောဆို ဆွေးနွေးညှိနှိုင်း ရမဲ့ကိစ္စမျိုး ဆိုရင်တော့ Email ပေးပို့ပြီး တင်ပြဆွေးနွေးတာမျိုး ၊ အစည်းအဝေးပြုလုပ်ပြီး ညှိနှိုင်းဆောင်ရွက်တာမျိုးပဲ ပြုလုပ်သင့်ပါတယ် ။
၄။ အတိုကောက်များ ၊ ဘန်းစကား အသုံးအနှုန်းများ Emoji များကို လျှော့ချပြောဆိုပါ ။
မိမိဆက်သွယ်ပြောဆိုနေတဲ့ Group Chat ဟာ လုပ်ဖော်ကိုင်ဖက်အချင်းချင်းအတွက်ပဲလား ၊ Management Level မှ အဆင့်မြင့်အရာရှိဝန်ထမ်းတွေရောပါဝင်နေတဲ့ Chat လားဆိုတဲ့အပေါ်မှာ မူတည်ပြီး မိမိရဲ့ ဆက်သွယ်ပြောဆိုမဲ့ စကားလုံးအသုံးအနှုန်းများကို အထူးဂရုစိုက် သုံးနှုန်းပြောဆိုသင့်ပါတယ် ။ အတိုကောက် စကားလုံး များ သုံးနှုန်းပြောဆိုမဲ့အခါမှာလဲ Chat ထဲမှာပါဝင်တဲ့ အခြားလူများ နားလည်သဘောပေါက်နိုင်မှု ရှိ/မရှိကိုလဲ ထည့်သွင်း စဉ်းစားဖို့လိုပါမယ် ။ မိမိရဲ့ ခံစားချက်အခြေအနေကို ဖော်ပြတဲ့အခါမျိုးမှာ Emoji ပုံလေးတွေကို သုံးနိုင်ပါတယ် ။ ဒါပေမဲ့ လိုတာထပ်ပိုအသုံးပြုခြင်းမျိုးကိုတော့ လျှော့ချသင့်ပါတယ် ။ Management Level တွေနဲ့ ပြောဆိုတဲ့ အခါမျိုးမှာဆိုရင် တော့ ဘန်းစကားတွေသုံးနှုန်းပြောဆိုမှုကို လုံး၀ရှောင်ရှားရမှာပဲဖြစ်ပါတယ် ။
၅။ ဖော်ရွေမှုနှင့် ယဉ်ကျေးမှုရှိစွာပြောဆိုပါ ။
ပညာရှင်ဆန်စွာပြောဆိုခြင်း ၊ တရားဝင်ပြောဆိုခြင်းဆိုသည်မှာ တခြားလုပ်ဖော်ကိုင်ဖက်တွေ၊ အပေါ်မှာ အထက်စီးဆန်ဆန် ကြမ်းတမ်းတဲ့ စကားလုံးတွေ သုံးနှုန်းပြောဆိုရမယ်လို့ဆိုလိုခြင်းမဟုတ်ပါ ။ မိမိတာဝန်ယူ ဆောင်ရွက်နေရတဲ့ လုပ်ငန်းစဉ်အပေါ်မှာသာ တိကျသောအချက်အလက်များနှင့် ပြောဆိုဆက်သွယ်မှုပြုဖို့ကို ဆိုလိုခြင်း ပဲဖြစ်ပါတယ် ။ လုပ်ဖော် ကိုင်ဖက်အချင်းချင်း ပြောဆိုကြတဲ့ အခါမှာတောင် “ကျေးဇူးတင်ပါတယ်” “ကျေးဇူးပြုပြီး” စတဲ့ ယဉ်ကျေးမှု ရှိတဲ့ အသုံးအနှုန်းတွေနဲ့သာ ပြောဆိုသင့်ပါတယ် ။ Group chat တိုင်းမှာ ယဉ်ကျေးမှု ၊ ဖော်ရွေမှုကို ဖော်ပြတဲ့ အသုံးအနှုန်းတွေပဲ သုံးနှုန်းပြောဆိုရမှာဖြစ်ပါတယ် ။ မိမိဟာ Group Chat တွေထဲမှာ ဒီလိုမျိုး Chat Ethic တွေကို လိုက်နာတဲ့သူ အဖြစ် ကျန်တဲ့လူအများကပါ မိမိကို Role Model အဖြစ်ထားပြီး မိမိပြုမှုပြောဆိုသလို အသုံးအနှုန်းတွေကို လိုက်လံကျင့်သုံးချင်လာအောင် ပြောဆိုသုံးနှုန်းရမှာပဲဖြစ်ပါတယ် ။
၆။ လေးစားမှုရှိစွာ သုံးနှုန်းပြောဆိုပါ ။
တဖက်သူမှ မိမိကို Attention ထားပြီး ဆက်သွယ်ပြောဆိုလာတဲ့အခါမျိုးမှာ “ဟုတ်ကဲ့ပါ” ၊ “ဆက်လက်ဆောင်ရွက်ပေးပါမယ်” ၊ “လက်ခံရရှိပါတယ်” ၊ “စစ်ဆေးပေးပါမယ်” စတဲ့ ပေးပို့သူကို အလေးထားမှု ရှိကြောင်းပြတဲ့ အသုံးအနှုန်းတွေနဲ့ ပြန်လည်ပြောဆိုကြရမှာဖြစ်ပါတယ် ။ Senior ၊ Junior ခွဲခြားပြီး Senior မှ Junior သို့ အထက်စီးဆန်တဲ့ စကားလုံးတွေပြောဆိုခြင်းမျိုး ၊ Junior မှလည်း Senior သို့ လေးစားမှုမရှိတဲ့ အသုံးအနှုန်းမျိုးနဲ့ ပြောဆိုဆက်သွယ်ခြင်းတွေကို Group Chat ထဲမှာ လုံးဝရှောင်ကြဥ်ရမှာဖြစ်ပါတယ် ။ အချိန်တိုင်းတွေးထားရမှာက မိမိဟာ ရာထူးအမျိုးမျိုးနဲ့ လူအများကြီးပါဝင်တဲ့ Business Chat မျာ ပြောဆိုနေတယ်ဆိုတဲ့ အချက်ပါပဲ ။ ဒါကြောင့် Group Chat ထဲမှာပါဝင်တဲ့ တခြားလူတဦးဦးကို ပြစ်တင်ပြောဆိုခြင်း ၊ စွပ်စွဲပြောဆိုခြင်း နှင့် ၎င်းလူ၏ အမှားကို ထောက်ပြဝေဖန်ခြင်းမျိုးကို Group Chat ထဲမှာမပြုလုပ်သင့်ပါဘူး ။ မည်သည့် Personal Attack မျိုးကိုမှ ပြောဆိုခြင်း မပြုသင့်ပါဘူး ။ ယဉ်ကျေးမှုရှိပြီး အပြုသဘောဆောင်တဲ့ စကားလုံးအသုံးအနှုန်းတွေသုံးပြီး ဆက်သွယ်ပြောဆိုခြင်း ဖြင့်သာ မိမိရဲ့ Professional Behaviours ကိုပြသသင့်ပါတယ် ။
၇။ သင်စိတ်ဆိုးဒေါသထွက်နေတဲ့အချိန်မျိုးမှာ Group Chat ကို အသုံးမပြုပါနှင့် ။
လုပ်ငန်းဆောင်ရွက်နေစဉ်အတွင်းမှာ အဆင်မပြေမှုဆိုတာမျိုးတွေ လူတိုင်းကြုံရနိုင်ပါတယ် ။ သင်စိတ်ဆိုး ဒေါသထွက်နေတဲ့အချိန် Group Chat ထဲမှာပြောဆိုလိုက်တဲ့ စကားတွေဟာ မသင့်လျော်တဲ့ အသုံးအနှုန်း တွေ ၊ နားလည်မှုလွဲစေမဲ့အသုံးအနှုန်းတွေသုံးပြီး တုန့်ပြန်ပြောဆိုမိသွားနိုင်ပါတယ် ။ အခြားသူရဲ့ ပြောစကားများကိုလဲ အမှားဘက်ကအမြင်နဲ့ကြည့်ပြီး အဓိပ္ပာယ်ကောက်လွဲတတ်ပါတယ် ။ ဒါကြောင့် ပြန်လည်တုန့်ပြန်မပြောဆိုခင်မှာ မိမိရဲ့ ဒေါသထွက်နေတဲ့ စိတ်ကို တည်ငြိမ်အောင် ခဏအနားပေးသင့်ပါတယ် ။ ဒေါသအလျောက် ပြန်လည်တုန့်ပြန်ပြောဆို မိခြင်းကြောင့် သင်နှင့်သင့်ရဲ့လပ်ဖော်ကိုင်ဖက်တို့ အကြားဆက်ဆံရေးပျက်ပြားမှုတွေကို ဖြစ်စေပါတယ် ။ လူအများ ကြားမှာ မိမိရဲ့ပုံရိပ်ကိုလဲပျက်စီးစေပါတယ် ။ ဒါကြောင့် မိမိစိတ်ဆိုးဒေါသထွက်နေတဲ့ အချိန်မျိုးမှာ Group Chat ကို ခဏလောက် ဖြစ်ဖြစ်မသုံးပါနဲ့ ။ စိတ်တည်ငြိမ်သွားသော အခါမှသာ သင့်လျော်သောအသုံးအနှုန်းများနှင့် ပြန်လည်ဖြေရှင်းပြောဆို ရမှာဖြစ်ပါတယ် ။
၈။ တဖက်လူ၏ ပြန်လည်ပြောဆိုမှုကို စိတ်ရှည်စွာဖြင့်စောင့်ဆိုင်းပါ ။
သင်ပို့လိုက်တဲ့ မက်ဆေ့ချ်ကို အကြောင်းပြန်ဖို့ တဖက်လူကို အချိန်ပေးပါ ။ မိမိအပါအဝင် အခြားသော လူတိုင်းမှာလဲ ၎င်းတို့လုပ်ကိုင်ဆောင်ရွက်နေရတဲ့ လုပ်ငန်းတာဝန်များစွာရှိနေကြောင်းကို သတိပြုပါ ။ ဒါကြောင့် သူတို့ ချက်ချင်းတုံ့ပြန်ပြောဆိုမှုမျိုး မပြုလုပ်နိုင်တာကို မိမိအနေနဲ့ နားလည်ပေးရပါမယ် ။ ကိုယ်ပို့လိုက်တဲ့ မက်ဆေ့ချ်ကို တဖက်လူက လျှင်မြန်စွာတုန့်ပြန်ပေးဖို့ မျှော်လင့်တက်ကြပါတယ် ။ ၎င်းတို့ဆီက ချက်ချင်းပြန်လည် ပြောဆိုမှု မရရှိတဲ့ အခါမျိုးမှာ ထပ်ဆောင်း မက်ဆေ့ချ်တွေ ပေးပို့တာမျိုးမပြုလုပ်ပါနဲ့ ။ ၎င်းရဲ့ ပြန်လည်တုံ့ပြန်နိုင်မှုကို စိတ်ရှည်စွာနဲ့ စောင့်ဆိုင်းရမှာပဲဖြစ်ပါတယ် ။
၉။ မိမိပေးပို့လိုက်သော စာသားများအား ပြန်လည်ပြင်ဆင်ခြင်းမပြုလုပ်ပါနှင့် ။
Chat ထဲမှာ မိမိပြောဆိုလိုက်တဲ့ စကားတွေဟာ တိကျသေချာမှုနဲ့ ပွင့်လင်းမြင်သာမှုရှိတဲ့ သဘောတရား သက်ရောက်ရပါမယ် ။ ဒါကြောင့်မိမိပြောဆိုတဲ့ အကြောင်းအရာတွေဟာ အချက်အလက်ခိုင်မာမှုပေါ် အခြေခံပြီး ပြောဆို ဆက်သွယ်ရမှာပဲဖြစ်ပါတယ် ။ Group Chat ထဲမှာ မိမိမှားယွင်းပေးပို့မိပြီးသော စကားများကို ပြန်လည်ပြင်ဆင်ခြင်မျိုး မပြုလုပ်သင့်ပါဘူး ။ မိမိအမှားအတွက် တောင်းပန်စကားပြောကြားပြီးမှ ၎င်းအကြောင်းအရာ အမှန်ကို ထပ်မံပြင်ဆင် ရေးသားပြီး ပေးပို့ရမှာဖြစ်ပါတယ် ။ သို့မှသာ Group Chat ထဲမှလူအများရဲ့ ယုံကြည်မှုကိုရရှိမှာ ဖြစ်ပြီး သင်ဟာ ပွင့်လင်း မြင်သာစွာ ဆက်သွယ်ပြောဆိုမှုရှိတဲ့ လူတဦးဖြစ်တယ်ဆိုတဲ့ ပြယုဒ်ကိုဖြစ်ပေါ်စေမှာ ဖြစ်ပါတယ် ။
၁၀။စကားပြောဆိုဆက်သွယ်မှုကို ကောင်းမွန်စွာအဆုံးသတ်ပါ ။
မိမိရဲ့ စကားပြောဆို ဆက်သွယ်မှုကို အဆုံးသတ်တော့မည်အခါမှာ “ကျေးဇူးတင်ပါတယ်” ဆိုတဲ့ စကားဖြင့် အဆုံးသတ်ပါ ။ ထို့သို့ပြောဆိုခြင်းဟာ မိမိနှင့် တဖက်မှလက်ခံပြောဆိုနေသည့်သူတို့အတွက် နောက်ထပ် ဆက်သွယ်ပြော ဆိုမှုများ ပြုလုပ်ရာတွင် ကောင်းသောဆက်ဆံရေးကို ဖြစ်စေမှာပဲဖြစ်ပါတယ် ။
အထက်ပါအချက်တွေဟာ သင့်ရဲ့ Professional Environment (သို့) လုပ်ငန်းခွင်၌ Group Chat နဲ့ ဆက်သွယ်မှု ပြုလုပ်တဲ့အခါ လိုက်နာကျင့်သုံးသင့်တဲ့ အခြေခံအကျဆုံး ကျင့်ဝတ်စည်းမျည်းတွေပဲဖြစ်ပါတယ် ။ သင်ကိုယ်တိုင်လဲ ၎င်း ကျင့်ဝတ်များကို တိတိကျကျ လိုက်နာကျင့်သုံးပြီး သင့်ရဲ့ ပညာရှင်ဆန်မှုကို သင့်ရဲ့ Professional Environment မှာ ပြသ ရမှာပဲဖြစ်ပါတယ် ။
နိဂုံးချုပ်အနေဖြင့်ဆိုရသော် Group Chat တွေဟာ မိမိနဲ့ လုပ်ဖက်ကိုင်ဖက်များရဲ့ လက်ရှိဆက်ဆံရေးကို ပိုမို ကောင်းမွန်စေမည့် အခွင့်အလမ်းတခုဖြစ်မှတ်ယူရမှာဖြစ်သလို မိမိနှင့် ၎င်းတို့အကြားဆက်သွယ်ဆောင်ရွက်နေရသည့် လုပ်ငန်းစဉ်များ ပိုမိုမြန်ဆန်ထိရောက်စွာ ပူးပေါင်း လုပ်ဆောင်နိုင်ဖို့ ဦးတည်ရမှာဖြစ်ပါတယ် ။ ဒါကြောင့် မိမိတို့လုပ်ငန်းခွင် အတွင်းဆက်သွယ်ရေး (Internal Communication) ကို သာယာသော ၊ အကျိုးရှိသော လုပ်ငန်းခွင် ဆက်ဆံရေးဖြစ်စေဖို့ အထက်ပါ Group Chat Etiquette တွေကို လိုက်နာကျင့်သုံးကြဖို့ အကြံပြုရေးသား ဖော်ပြလိုက်ပါသည်။
~ Emilia ~
Aug, 23, 2020
Reference Source ---
Keep Reading