ဧကရာဇ်မင်း၏ အတွေးမှတ်စု စာစောင်ငါး (၁၅-၂၅)

၁၅။ လူ ဆိုတာ ဘာလဲ။  လူကို အဓိပ္ပါယ် အနက် ဖော်ဆောင်လို့ မရနိုင်ဘူး။အနက်အဓိပ္ပါယ် မရှိတဲ့ သတ္တဝါကို လူ လို့ခေါ်တယ်။ ကောင်းခြင်းကိုလည်း မလိုလားသလို၊ ကောင်းခြင်းကို လိုက်စားတာလည်း လူပဲ ဖြစ်တယ်။ ကောင်းခြင်းကို ရယူတာလည်း လူဖြစ်သလို၊ ကောင်းခြင်းကနေ သွေဖယ်တာလည်း လူပဲ ဖြစ်တယ်။ 

ကောင်းခြင်းကို ပေးလိုတာလည်း လူဖြစ်သလို၊ ကောင်းခြင်းအတွက် ပေးဆပ်တာလည်း လူပဲ ဖြစ်တယ်။ လူဟာ လူမပီသနိုင်ဆုံးသော သတ္တဝါဖြစ်ပြီး၊ လူပီသနိုင်ဆုံး တိရစ္ဆာန်က လူပဲ ဖြစ်တယ်။ ကောင်းဖို့ ကြိုးစားတဲ့ သတ္တဝါသာလျှင် လူပီသနိုင်တဲ့ တိရစ္ဆာန်ဖြစ်တယ်။ လူဖြစ်ကြောင်း ငြင်းဆန်တဲ့ တိရစ္ဆာန်ဟာ လူစင်စစ်ဖြစ်တယ်။ 

၁၆။ အသိဉာဏ်ရည် အဆင့်အတန်း အလိုက် တွေးခေါ်ကြံစည်တတ်ကြတယ်။ အတွေးအကြံအလိုက် စိတ်နှလုံးသားရဲ့ အရောင် ပြောင်းလဲတတ်တယ်။ ကောင်းတဲ့ဘဝကို လိုချင်တဲ့ စိတ် ပြင်းပျရင် ကောင်းတဲ့ ဘဝကို ရနိုင်မယ်။ မရရအောင် အားထုတ်ဖို့တော့ လိုတာပေါ့။ လိုချင်စိတ် ပြင်းပျမှုအလိုက် ရထိုက်တာကို ရနိုင်တယ်။ရည်ရွယ်တဲ့ စိတ်ထား ထက်သန်မှု အလိုက် အကျိုးခံစား ရလိမ့်မယ်။ 

အတ္တရဲ့ စေ့ဆော်မှု မရှိဘဲ ရုန်းကန်လို့ မရသလို၊ အတ္တကြီးလွန်းရင်လည်း ဘယ်လောက်ပဲ ကြိုးစားပါစေ၊ ရှေ့မဆက်နိုင်ဘူး။သိစိတ် နဲ့ မသိစိတ်၊ သတိ နဲ့ အသိ မျှတအောင် ထိန်းညှိပြီး၊ အမြော်အမြင်ရှိရှိ တွေးတောဆင်ခြင်နိုင်မှ အကျိုးရှိမှုကို ဖော်ဆောင်နိုင်လိမ့်မယ်။ 

၁၇။ မဖြစ်နိုင်တာကို လုပ်ချင်တာက ရူးသွပ်မှု။ မရနိုင်တာကို ရချင်တာက မိုက်မဲမှု။ မသိနိုင်တာကို သိချင်တာက ရူးနှမ်းမှု ဖြစ်တယ်။ ရူးသွပ်မှု၊ မိုက်မဲမှု၊ ရူးနှမ်းမှုတွေကြောင့် ပညာရှိလာကြတယ်။ 

၁၈။ စိတ်ရှည်၊ သည်းခံမှု မရှိတဲ့သူတွေအတွက် ကောင်းကျိုး မရှိနိုင်ဘူး။ခေါင်းမာမှု နဲ့ မိုက်မဲမှု ကို ယှဉ်နိုင်တဲ့ ပညာ မရှိဘူး။အမူအကျင့်တွေကနေ တဆင့် စရိုက်သကန်ကို နားလည်နိုင်တယ်။ 

၁၉။ လူသားနဲ့ အနီးစပ်ဆုံးသော တိရစ္ဆာန်က လူသားပဲ ဖြစ်တယ်။ လူကိုလူပဲ နားလည်နိုင်တယ်။ သည်းခံနိုင်တယ်။ ရက်စက်နိုင်တယ်။ အန္တရာယ် ပြုနိုင်တယ်။ဖျက်ဆီးနိုင်တယ်။ ပြောင်းလဲ နိုင်တယ်။ ကယ်တင်နိုင်တယ်။ပြုပြင်နိုင်တယ်။လမ်းပြနိုင်တယ်။ဦးဆောင်နိုင်တယ်။ဆွဲဆောင်နိုင်တယ်။ဩဇာညောင်းတယ်။ ရိုးကျိုး နိုင်တယ်။ လှည့်ဖျားနိုင်တယ်။ ရွံ့မုန်းကြတယ်။ ရန်လိုကြတယ်။ မပြောင်းလဲတာလည်း လူပဲ။ ပြောင်းလဲချင်တာလည်း လူပဲ။

၂၀။ စိတ်သွားတိုင်း ကိုယ်မဆောင်နိုင်ဘူး။ စိတ်အလို ကိုယ်မလိုက်နိုင်ဘူး။ စိတ်နဲ့ ကိုယ် လားလားမှ မပက်သက်ဘူး။ စိတ်စေရာ ကိုယ်မလိုနိုင်တာကြောင့်၊ စိတ်အလိုဆန္ဒကို ဖြည့်ဆည်းဖို့ထက်၊ ကိုယ်ခန္ဓာရဲ့ လိုအပ်ချက်ကို သိအောင် လုပ်ရမယ်။ ကိုယ်ခန္ဓာရဲ့ လိုအပ်ချက်ကို ဖြည့်ဆည်းလို့ ရနိုင်ပေမယ့်၊ စိတ်အလိုကို ဘယ်တော့မှ ပြည့်ဝအောင် ဖြည့်ဆည်းနိုင်မှာ မဟုတ်ဘူး။ 

ရုပ်ဝတ္ထု ပျက်စီးယိုယွင်းမှုကို အစားထိုး၊ ပြင်ဆင်၊ ပြုပြင်၊ ပြောင်းလဲလို့ ရနိုင်တယ်။ စိတ်နှလုံး ပျက်စီးယိုယွင်းသွားရင်တော့ အစားထိုးလို့ မရသလို၊ ပြုပြင် ပြောင်းလဲလို့ မရနိုင်ဘူး။

၂၁။ လောကမှာ အလေးအမြတ်ထားအပ်တဲ့ အရာကို တန်ဖိုးထား၊ မြတ်နိုးပါ။ သာဓက - တိုင်းနိုင်ငံ မှာ ပြဋ္ဌာန်း အပ်တဲ့ တရားဥပဒေ၊ အကြီးအမှူး၊ ခေါင်းဆောင် စသည်နှလုံးသား အတွက် အလေးအမြတ် ထားအပ်တဲ့ အရာကို တန်ဖိုးထား၊ မြတ်နိုးပါ။ သာဓက - ချစ်မြတ်နိုး တွယ်တာရသူ၊ မိသားစု၊ အိမ်သူ၊ အိမ်သား၊ ဇနီးမယား၊ သားသမီး၊ မြေးမြစ် စသည်

၂၂။ အသိုက်အမြုံအတွက် အန္တရာယ်မရှိရင်၊ အသင်းအပင်း အတွက် ပူစရာမရှိပါ။ကိုယ့်အပေါ် ထိခိုက်ပေမယ့်၊ ကိုယ်နေထိုင်တဲ့ အသိုက်အမြုံအပေါ် ထိခိုက်မှု မရှိရင်၊ ရန်သူရဲ့ လုပ်ရပ်ဟာ အန္တရာယ် မရှိပါ။ 

ကိုယ့် အပေါ်လည်း ထိခိုက်သလို၊ ကိုယ်နေထိုင်တဲ့ အသိုက်အမြုံအပေါ် ထိခိုက်မှု ရှိလာရင် ရန်သူရဲ့ လုပ်ရပ်ဟာ အန္တရာယ် ရှိတဲ့အတွက် ကာကွယ်နိုင်ဖို့ ကြိုးစားပါ။ သည်းခံခြင်းဟာ ရန်သူအပေါ် အသာစီးရယူမှု ဖြစ်ပေမယ့်၊ အန္တရာယ်ရှိနိုင်မှန်း သိလျက်နဲ့ အပြစ်ကျေအေးစိတ် မမွေးသင့်ပါ။ကာကွယ်လို့ ရနိုင်တဲ့ အန္တရာယ် အတွက် ကြိုတင်ပြင်ဆင်ခြင်းနဲ့ အသာစီးရယူပါ။ခုခံလို့ ရနိုင်တဲ့ အန္တရာယ်ကို တန်ပြန် တုန့်ပြန်ခြင်းနဲ့ အသာစီးရယူပါ။

၂၃။ လျင်မြန်စွာ ဖြစ်သမျှ ခဏပဲ ခံတယ်။ တစ်ရိပ်ရိပ် နဲ့ တဖြည်းဖြည်းခြင်း ဖြစ်လာရင်တော့ တော်ရုံတန်ရုံနဲ့ ပျက် စီးဖို့ မလွယ်ဘူး။အချိန်တိုအတွင်း ဖြစ်လာတဲ့ ပြဿနာကို စိတ်ရှည်လက်ရှည်နဲ့ ဖြေရှင်းပါ။အချိန်အကြာကြီး အ ရှိန်ယူပြီး ဖြစ်လာတဲ့ ပြဿနာကို ဖြေရှင်းလို့ ရနိုင်တဲ့ အပိုင်းကဏ္ဍကနေ စတင်ပြီး ချက်ချင်း လက်ငင်း ဖြေရှင်းပါ။ အချိန်မဆွဲရ။ 

၂၄။ မှတ်ထားဖို့။ဖြစ်စဉ်ဖြစ်ရပ်တွေ ဆိုတာက ကိုယ်ဘဝအပေါ် သက်ရောက်မှု အားနည်းတယ်။အချိန်ကာလ ဆိုတာက ကိုယ့်ဘဝ အတွက် အရေးကြီးပြီး အသုံးမချတတ်ရင် အကျိုးနည်းစေနိုင်တယ်။ ကံတရား ဆိုတာက ကိုယ့်ဘဝ ကို ကိုယ်တိုင် စီရင်ခွင့် ပေးလာတဲ့ အကြောင်းတရား ဖြစ်တယ်။ 

၂၅။ ကိုယ့်အပေါ် အကောက်ကြံ၊ မတရားပြု၊ မကောင်းကြံလာရင်၊ အဲတာ သူတို့ ကိစ္စ။ သူတို့ စရိုက် နဲ့ သူတို့ အပြု အမူတွေက သူတို့ ဘဝကို ပြန်စီရင်လိမ့်မယ်။ ကိုယ့်အပေါ် ထိခိုက်လာရင်၊ ခုခံသင့် ခုခံ၊ ကာကွယ်သင့် ကာကွယ်၊ ကလဲ့စားစိတ်နဲ့ တန်ပြန် ရန်မူတာမျိုး မလုပ်နဲ့။ အချိန်၊ အခြေအနေ၊ အနေအထား၊ နေရာတကျ ဖြစ်သွားမှ လက်တုန့်ပြန်ပါ။ အချိန်ဟာ ဘယ်အရာကိုမဆို ကုစားနိုင်တယ်။

#မောရိသျှ