ကျောက်ပေဒိုး ဖိုးစိန်

အိမ်ထောင်စု​ စာရင်းမှာ​ နာမည်အပြည့်အစုံရှိသော်​လည်း​သူ့ကိုတစ်ရွာလုံးက"အဝိန်"ဟုပဲအဖျား​ဆွတ်ခေါ်ကြသည်။ အဝိန့်ဆိုင်ကို​ စျေးသွားဝယ်မလို့​ ဟုပဲပြောကြသည်။အဝိန့်ဆိုင်မှာစားစရာ၊ ကစားစရာ၊ တို​လီမိုလီ အကုန်ရသည်။ နာရေးရှိလို့​ ဖဲထုပ်ဝယ်ဦး​ မလား..ရသည်။

ခုတလော​ အရောင်းသွက်နေသည်မှာကလေးတွေ က​စားသည့်ကျောက်ပေဒိုး ခေါ်​ ကျောက်ပေသီးများဖြစ်​၏။ဝိုင်းဝိုင်း စက်စက် မာမာ​ ဖွေးဖွေး၊ကလေးတွေ​ က​စားချင်စရာ။ တွင်းမလှိမ့်နဲ့၊ ပေသီးမပစ်နဲ့။ ပေါက်ကြည့်၊ ခွဲကြည့်၊ မာတယ် ဟု အဝိန်က နည်းပေးလမ်းပြလုပ်နေသေး။ကလေးတွေလည်း တခွမ်းခွမ်းပေါက်၊ တခွမ်းခွမ်းကွဲ၊မုန့်ဝယ်မစားဘဲပေသီးပဲခွဲနေကြတော့​၏။သူ့ဒိုးငါစား၊ငါ့ဒိုးသူစား..အငြိုးအတေးများလည်းပါလာသည်။ သူတပါးဒိုးကို​ ကွဲအောင်ပေါက်နိုင်လျှင်စားသည်ဟု​ ပြောကြခြင်းဖြစ်၏။​ အများဆုံးစားသည့်ဒိုးမှာ"ဖိုးစိန်"၏ကျောက်ပေဒိုးဖြစ်၏။

သူ့ကျောက်ပေဒိုးမှာချော်ရည်လိုလို၊စဥ့်ရည်လိုလိုပါးပါးလေးသုတ်​ ထားသည်။ အပေါ်ကနေလည်းစား။အောက်ကနေလည်းစားသည့်ဒိုး။ အဝိန့်ဆိုင်မှာ​ မရှိ။ကွဲလွယ်သည့်​ ကျောက်ပေဒိုးတွေပဲရှိသည်။ ဘယ်ကဝယ်သလဲ။ဖိုးစိန်ကိုလည်း မေးလို့မရ။

တစ်ခါတော့ ဖိုးစိန်၏ကျောက်ပေဒိုး အစားခံရသည်။ကွဲရုံမက ကြေမွသွားသည်။တဖက်ကျောက်ပေဒိုးကိုကြည့်ပြီး ဖိုးစိန် အာမေဍိတ် ထွက်သွား၏။

" ဟာ..အဝိန်.." ။

#ဂျိုဇော်
#ကျောက်ပေဒိုးဖိုးစိန်