ကြိုတင်ပြင်ဆင်ခြင်းက အနာဂတ်အတွက် ကောင်းဆုံးတည်ဆောက်ခြင်းပဲ

◾
“လူတွေရဲ့ သဘောသဘာ၀တစ်ခုက နေ့စဉ်အလုပ်တွေထဲမှာပဲ နစ်မြုပ်နေတတ်ပြီး အနာဂတ်အတွက် ပြင်ဆင်ဖို့မေ့လျော့တတ်ကြတာပဲ။”

တစ်လောက မတွေ့တာကြာပြီဖြစ်တဲ့ အဒေါ်တစ်ယောက်နဲ့တွေ့တော့ သူရုပ်က တော်တော်အိုစာသွားတာ သတိထားမိတယ်။ အဒေါ် ဘယ်လိုများဖြစ်သွားတာလဲပေါ့။ စကားတွေ အများကြီးပြောဖြစ်တော့မှ သဘောပေါက်သွားတယ်။ အဓိကအကြောင်းရင်းက သူ့အမျိုးသား ပင်စင်ယူတဲ့ကိစ္စကစတာပဲ။ သူ့အမျိုးသားက အရင်က အာဏာပါဝါရှိတဲ့အစိုးရအရာရှိကြီးတစ်ဦး၊ ဝင်ငွေလည်း ကောင်းခဲ့တယ်လို့ပြောလို့ရတယ်။ အဲဒီအချိန်မှာ သားဖြစ်သူကလည်း မိဘကိုကောင်းကောင်းထောက်ပံ့တယ်။ အဲဒီအချိန်ကာလက အဒေါ်တို့မိသားစု ရွှေထီးဆောင်းတဲ့ကာလတွေပေါ့။

နောက်ပိုင်း သူ့အမျိုးသားက ပင်စင်ယူလိုက်သလို သားဖြစ်သူကလည်း အိမ်ထောင်ကျလို့ ကောင်းကောင်းမထောက်ပံ့နိုင်တော့ဘူး။ အရင်ဝင်ငွေကောင်းခဲ့ချိန်က စုဆောင်းမှုနဲ့ ရင်းနှီးမြှုပ်နှံမှု သေချာမလုပ်ထားတဲ့အခါ သူတို့မိသားစုဟာ ပင်စင်ဝင်ငွေလေးနဲ့ ဝင်ငွေကျပ်တည်းလာတယ်။ အဲဒါထက် ပိုဆိုးတာက အမျိုးသားဖြစ်သူက အရင်ကအာဏာနဲ့ ဝင်ငွေရှိခဲ့ပြီး ဗြုန်းဆို ဘာအာဏာမှမရှိ၊ ဝင်ငွေလည်းမကောင်းတော့တဲ့အခါ အတော်ပြောင်းလဲသွားတယ်။ မိသားစုနဲ့ ဆက်ဆံရေးက အရင်လို နွေးနွေးထွေးထွေးမရှိတော့တဲ့အပြင် ပြဿနာပါရှာတတ်လာလို့ဆိုတယ်။ အဒေါ်ကတော့ သူတို့လင်မယား မကြာခဏစကားများတဲ့အကြောင်းပြောပြသလို ဘာအလုပ်လုပ်ရင်ကောင်းမလဲလည်း အားငယ်တဲ့အသံနဲ့ မေးရှာတယ်။

ဒီလိုလူတွေ၊ ဒီလိုမိသားစုတွေ ပတ်ဝန်းကျင်မှာ တော်တော်လေးတွေ့ရတယ်။ ဆိုတော့ လူတစ်ယောက်၊ မိသားစုတစ်စုအနေနဲ့ ငွေကြေးအရပဲကြည့်ကြည့်၊ ဘ၀နေနနည်းအရပဲ ကြည့်ကြည့် ပင်စင်ယူတဲ့အချိန်တွေအတွက် ပြင်ဆင်မှုလုပ်ဖို့ တော်တော်လေးအရေးကြီးတာတွေ့ရတယ်။

လူတွေရဲ့ သဘောသဘာ၀တစ်ခုက နေ့စဉ်အလုပ်တွေထဲမှာပဲ နစ်မြုပ်နေတတ်ပြီး အနာဂတ်အတွက် ပြင်ဆင်ဖို့မေ့လျော့တတ်ကြတာပဲ။ "အနာဂတ်ကိစ္စလား ဝေးပါသေးတယ်"၊ "နောင်ခါလာ နောင်စျေး" ဆိုတာလည်းရှိသေးတယ်။ တကယ်တမ်းတော့ ပင်စင်ယူတဲ့အသက်အရွယ်အတွက်ဆိုတာ ပြင်ဆင်ချိန် တော်တော်ရပါတယ်။ ထားပါတော့ အနည်းဆုံး ဝင်ငွေကောင်းကောင်းရှာနိုင်တဲ့၊ မိသားစုကို ကောင်းကောင်းဦးဆောင်နိုင်တဲ့ ၃၅-၄၀ အရွယ်လောက်မှာပဲ စပြင်ဆင်ဦး နှစ်ပါင်း ၂၀ ကျော်လောက်အချိန်ရတယ်။

ပြင်ဆင်တဲ့အခါ နေရေးရော၊ ငွေကြေးပါ အရေးကြီးပါတယ်။ နေတတ်အောင်ဘယ်လိုလေ့ကျင့်မလဲ။ အလုပ်ဆိုတာ ငွေတစ်ခုတည်းပေးနိုင်တာမဟုတ်ဘဲ နေ့စဉ်ဘ၀အတွက် တွန်းအားပါပေးနိုင်တယ်။ ဂျပန်တွေဆိုရင်တော့ ပင်စင်ဆိုတာ သူတို့အတွက်အဓိပ္ပာယ်သိပ်မရှိလှဘူး။ အသက် ၇၀ လောက်ထိ အလုပ်လုပ်ကောင်းတုန်း၊ ဆိုလိုချင်တာက ဂျပန်တွေလောက်အလုပ်မလုပ်ရင်တောင် နေ့စဉ်ဘ၀ကို ဘာတွေလုပ်ပြီးဖြတ်သန်းမလဲ ကြိုစဉ်းစားထားဖို့လိုတယ်။ အလုပ်တစ်ခုခုလား၊ ဝါသနာပါတာလား၊ ဘာသာရေးလား စသဖြင့်ပေါ့။

အဲဒါထက် လက်တွေ့ပိုအရေးကြီးတာကတော့ ငွေကြေးပိုင်းပဲ။ ခင်ဗျား ဝင်ငွေနည်းပါးသွားချိန်မှာလည်း နေ့စဉ်အသုံးစရိတ်က ထွက်နေမှာပဲ။ ကိုယ့်ရဲ့ Living Cost တော့ အနည်းဆုံး မပူမပန်ရအောင် ပြင်ဆင်ထားဖို့လိုတယ်။ သေချာတာက Retirement Planning, Future Planning သေချာမလုပ်ရင်တော့ အနာဂတ်မှာ သောကများရဦးမှာပဲ။

#HeinZaw
#FuturePlanning
#RetirementPlanning
#Pensioner