မြန်မာ့သမိုင်းထဲကမေ့မရတဲ့ အမျိုးသားခေါင်းဆောင်ကြီး (သို့) ဗိုလ်ချုပ်အောင်ဆန်း

“ကြည်ရေ... ပဲပြုတ်နဲ့ နံပြားရရင် စားချင်တယ်" ဆိုတဲ့ စကားတစ်ခွန်းက ဒီနေ့အတွက် ဂန္တဝင် အမြောက်ဆုံးပင်။

သူ့ဘဝတစ်လျှောက်လုံး တန်ဖိုးထားပေးဆပ်ခဲ့ရတဲ့ မြန်မာနိုင်ငံအရေး လုပ်ဆောင်ကြိုးစားမှုတွေက ၁၉၄၇ ခုနှစ် ဇူလိုင်လ ၁၉ ရက်မှာပဲ ပန်းတိုင်မရောက်ခင် လုပ်ကြံခံခဲ့ရပြီး ဝမ်းနည်းဖွယ်ဆုံးရှုံးမှုကြီးတစ်ခုအဖြစ် ကျန်ရစ်ခဲ့ရတဲ့အဖြစ်အပျက်တွေကို နှမြောတသဖြစ်ရုံမှလွဲ အခုဆိုရင် ဘာမှမလုပ်နိုင်ခဲ့ကြတော့ပါဘူး။

မကွေးတိုင်းဒေသကြီး နတ်မောက်ခရိုင်မှာ မွေးဖွားခဲ့ပြီးနောက် မြန်မာနိုင်ငံကို လွတ်လပ်ရေးရအောင် အစွမ်းကုန်ကြိုးစားခဲ့ပြီး အခုဆိုရင် ဗိုလ်ချုပ်အောင်ဆန်းရဲ့ အငွေ့အသက်နဲ့ သမိုင်းကြောင်းတွေကို ပြန်ကြည့်မယ်ဆိုရင် ရန်ကုန်မြို့က တစ်ခုတည်းသော ဗိုလ်ချုပ်အောင်ဆန်းပြတိုက်မှာပဲ နှောင်းလူတွေ တွေ့မြင်နိုင်တော့မယ်လို့ မြင်မိလေရဲ့။

လွတ်လပ်ရေးဖခင်ကြီး‌ ဗိုလ်ချုပ်အောင်ဆန်း၏ (၁၁၀) နှစ်ပြည့် မွေးနေ့အား SarPhat မှလည်း လေးစားစွာဖြင့် ဂုဏ်ပြုရင်း သမိုင်းဝင်ပြောစကားတွေကိုလည်း ပြန်လည်မျှဝေပေးလိုက်ပါတယ်။

ဗိုလ်ချုပ်၏ စကားများ

ဗမာက တစ်မျိုး၊ ကရင်က တစ်ဖုံ၊ ရှမ်း၊ ကချင်၊ ချင်းတို့က တစ်ခြား အကွဲကွဲ အပြားပြား လုပ်နေကြရင် အကျိုးရှိမှာ မဟုတ်ဘူး။ စုပေါင်း လုပ်မှသာ အကျိုး ရှိနိုင်မယ်။

(၁၉၄၇၊ ဖေဖော်ဝါရီ ၁၁ ရက်၊ ပင်လုံမိန့်ခွန်း)

လူကြီးဆိုတာ အသက်ကြီးတာကို ဆိုလိုတာလား။ မဟုတ်ဘူး။ အသက်မကြီးပေမယ့် လုပ်တဲ့ အလုပ်ကြီးရင် လူကြီးပဲ။

(၁၉၄၄၊ မတ် ၁၄၊ ဗိုလ်သင်တန်း ကျောင်းဆင်းမိန့်ခွန်း)

ဟေ့ ... သေလဲ ဗမာပီပီ ဇာတိမာန်နှင့် သေကြပါ .. ရန်သူကို မိမိလက်အားနေရင် လက်နှင့်ထိုး၊ ခြေအားနေရင် ခြေနဲ့ကန်ပါ ..။ နောက်ဆုံး ပါးစပ်အားနေလျှင် ပါးစပ်နှင့် ကိုက်ပြီးမှ ရဲ⁠ရဲသေပြလိုက်ကြတာပေါ့ ...။

(ဗိုလ်ချုပ်အောင်ဆန်းနှင့် ရဲဘော်သုံးကျိပ်တို့ ဟေနန်ကျွန်းတွင် ဂျပန်များက စစ်ပညာသင်ပေးနေကြစဉ် ဂျပန်တို့က ၎င်းတို့အား အားလုံးဖျောက်ဖျက်မည့် အခြေအနေမျိုးကို ကြုံတွေ့နေကြရစဉ်)

ရဲဘောသုံးကျိပ်ဟာ နိုင်ငံရေးအဖွဲ့ တဖွဲ့တည်း မဟုတ်ပဲ သခင်ဂိုဏ်းကြီးနှစ်ခုဖြစ်တယ်၊ အနာဂတ် လွတ်လပ်ရေးတိုက်ပွဲမှာ ဒီသုံးကျိပ် ညီညွတ်ဖို့ လိုတယ်။ ဒါမှ လူငယ်များဖြစ်တဲ့ သခင်ဂိုဏ်း နှစ်ဂိုဏ်းလုံး ညီညွတ်မယ်။ ဒါမှ လူများစုကို ကိုယ်စားပြုမဲ့လူတွေ တကယ်လဲ အလုပ်လုပ်ကြမဲ့ လူငယ်တွေ ညီညွတ်မယ်။ ဒါမှ လွတ်လပ်ရေးတိုက်ပွဲဟာ ခိုင်မာတောင့်တင်းမယ်။

စစ်ထွက်ကြတာပေါ့၊ ရှေး⁠ရှေးတုန်းက ဗမာ့တပ်တွေ စစ်ထွက်ကြတာ တနင်္သာရီကို လှေကြီးတွေနဲ့ ရေကြောင်းလွှင့်ကြတော့ တချို့က ရေကြောင်းမှားပြီး ရခိုင်ပြည်ဘက် ရောက်လိုရောက်ဖြစ်ကြတာပဲ၊ ဒါပေမဲ့ ရောက်တဲ့နေရာက ဆက်ပြီး ဖြစ်သလို လုပ်ကြတာပေါ့ ...။

(ဗိုလ်ချုပ်အောင်ဆန်းတို့ ယိုးဒယားတွင် တပ်များစုကြပြီး တပ်စစ်ကြောင်း အသီးသီးထွက်ရန် စီစဉ်ကြစဉ် ဖာပွန်စစ်ကြောင်း ချီတက်ရန် တာဝန်ကျသူ ဗိုလ်ကျော်ဇောက ဗိုလ်ချုပ်အောင်ဆန်းအား ကန်တော့သောအခါ)

ခင်ဗျားတို့ရွှာကို ရှေးယခင်တုန်းက ယုံမိတယ်၊ ဘာ့ကြောင့်လဲဆိုတော့ ဆရာစံထတုန်းကလဲ ထထကြွကြွရှိတဲ့ ရွာတရွာလို့ အသိအမှတ်ပြုခဲ့တယ်၊ မှင်နီ အဝိုင်းခံခဲ့ရတယ်၊ ခုတော့ ကျုပ်အထင်ကြီးသလောက် မဟုတ်တာ တွေ့ရတယ် ...။

(ပဲခူးခရိုင် ဝေါအပိုင် အညာစုရွာ ဗိုလ်ချုပ်အောင်ဆန်း ရောက်၍၊ ရဲဘော် ၃၇ ယောက်စုရန်ပြောရာ ရပ်ရွာထဲက တုတ်တုတ်မလှုပ်ကြ၍ ဗိုလ်ချုပ်အောင်ဆန်းက)

ကိုးကား - https://my.wikipedia.org/wiki/အောင်ဆန်း